«Գրենք Հայաստանում» ստեղծագրության միջազգային ճամբարը հնարավորություն է ընձեռում երիտասարդ գրողներին միավորվելու ստեղծագրության տասնօրյա բազմաբնույթ ծրագրի շրջանակներում, սովորելու միմյանցից և ճանաչելու միմյանց: Ճամբարի ծրագիրը մշակվել է Այովայի համալսարանի գրողների միջազգային ծրագրի հետ համագործակցությամբ և նրանց կողմից իրականացվող «Տողերի միջև» ճամբարի մոդելի հիման վրա:
ՆԱԽԱԳԾԵՐ
ԱՐԻ գրականության հիմնադրամը համակարգում է Գալուստ Կիւլպէնկեան հիմնադրամի կողմից նախաձեռնած թարգմանական մատենաշարի նախագիծը: Նախագծի նպատակն է հիմնարար հումանիտար և գիտական տեքստերը հասանելի դարձնել հայերեն թարգմանությամբ: Այս նախաձեռնությունը նաև կնպաստի հայերենի զարգացմանը, նոր բառապաշարի ներդրմանը, ինչպես նաև թարգմանիչների խմբի ընդլայնմանը:
Փառատոնի նպատակն է ստեղծել կին գրողների համար միջազգային հարթակ, որտեղ նրանք կներկայացնեն իրենց պատմությունները՝ կայացման ճանապարհին իրենց առջև ծառացած մարտահրավերների, անհաջողությունների, հիասթափությունների, դժվարությունների մասին: Փառատոնի ուշադրության կենտրոնում է կին գրողի դերը մշակույթում, հասարակության մեջ և հասարակության դերը կանանց գրականության մեջ:
«ԱՐԻ գրականության հիմնադրամը» ԱՄՆ դեսպանության դրամաշնորհային ծրագրի ֆինանսավորմամբ իրականացնում է «Ներառական գրքերի շարք․ ՏԱՐԲԵՐ պատմություններ» նախագիծը ։ Ծրագրի շրջանակներում հրատարակվեց երկու նկարազարդ գիրք «Չեմպիոնը» և «Ես խոսում եմ պարելով»․ հեղինակ՝ Գայանե Աղաբալյան, նկարազարդող՝ Լուսինե Սահակյան։ Նախագծի թիմը այցելելու է բոլոր մարզեր՝ ներկայացնելու գրքերը դպրոցներում և խարխուսելու գրքերի միջոցով ներառականության մասին զրույցները։
«ԱՐԻկարդանք» ակումբը ընթերցանության խթանման նախաձեռնություն է, որի նպատակն է զարգացնել ընթերցանության սովորությունները վաղ տարիքից, դարձնել ընթերցանությունը գրավիչ գործիք `գիտելիքներ ձեռք բերելու համար, և միևնույն ժամանակ ժամանցի այլ տարբերակներին մրցակցող զբաղբունք։ «ԱՐԻկարդանք» ակումբի գործունեությունը ուղղված կլինի տարրական և միջին դպրոցի աշակերտների ընթերցանության, ստեղծագրության, քննադատական մտածողության և հանրային խոսքի հմտությունների ամրապնդմանը։ Ակումբը կհյուրընկալի գրողների և այցեր կկազմակերպի գրախանութներ, գրադարաններ և թանգարաններ:
Գրականության հետազոտություններ
ԱՐԻ գրականության հիմնադրամը և Ադենաուեր հիմնադրամը համագործակցություն են սկսում։ «Հիշողության մշակույթ․ խորհրդային անցյալը և նրա արտացոլումը հայ գրականության մեջ» խորագրով նախագծի շրջանակներում կիրականացվի երեք հետազոտություն, որոնց նպատակն է ուսումնասիրել Հայաստանում խորհրդային և հետխորհրդային գրականության մեջ արտացոլված հիշողության մշակույթը։ Նախագծի նպատակն է վերհանել այդ հիշողության հետքերը գեղարվեստական գրականության, գրական մամուլի և արխիվների էջերից։
Աջակցություն ենթակառուցվածքների զարգացմանը
Գրական թարգմանիչների հայկական ընկերակցությունը համախմբել է Հայաստանում և ամբողջ աշխարհում գործող հայերենից և հայերեն գրական թարգմանիչներին։ Ընկերակցության տեսլականն է համաշխարհային գրահրատարակչական դաշտի հետ ամուր կապեր հաստատելու միջոցով արդիականացնել հայկական թարգմանական ավանդույթները։ Գրական թարգմանիչների հայկական ընկերակցության առաքելությունն է ապահովել ոլորտի զարգացումը և համագործակցությունը միջազգային մասնագիտական հարթակների և կառույցների հետ։
ԱՐԻ գրականության հիմնադրամը Hyestart–ի աջակցությամբ խթանել է ՓԵՆ Հայաստանյան կենտրոնի վերահիմնավորումը: Հայաստանի ՓԵՆ կենտրոնը ետխորհրդային տարածաշրջանում առաջիններից էր, որի հիմնադիր է հանդիսացել Գևորգ Էմինը դեռևս 1991 թվականին։ Այնուհետև կազմակերպության առաջնորդությունը ստանձնել են անվանի գրական թարգմանչուհի Աննա Հակոբյանն ու իրավապաշտպան Միքայել (Միկա) Դանիելյանը։ Տեղական կառույցը վերակազմավորվել է 2017 թվականին։
Ծրագրերի արխիվ
2018-2020 թթ․-ի Ժաքլին Վուդսոնի «Ամեն բարություն» գրքի և հակաբուլինգի ծրագիր
2018 թ․-ի Վիշեգրադի արևելյան ընկերակցության գրական մրցանակ
2017թ.-ի Այովայի համալսարանի`«Սահմանագծեր և տարածություններ» ընթերցանության շրջագայություն ծրագիր