«ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագիծ։ Այցելություն Եղեգնաձոր՝ «Մաշտոց» հրատարակչական հիմնադրամ
Հունիսի 17-ին «ԱՐԻ գրականության հիմնադրամի» թիմը «ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագծի մարզային
այցերի շրջանակներում այցելեց Վայոց Ձորի մարզ, Եղեգնաձոր քաղաք, որտեղ մեզ հյուրընկալեց
Մաշտոց հրատարակչական հիմնադրամը՝ ներկայացնելու և հանդիպման մասնակիցներին նվիրելու
ծրագրի շրջանակներում լույս տեսած «Ես խոսում եմ պարելով» և «Չեմպիոնը» ներառական գրքերը։
Տեղի ունեցավ երկու հանդիպում՝ նախ դպրոցի աշակերտների, իսկ հետո ուսուցիչների հետ։
Հանդիպման հյուրերն էին Եղեգնաձորի N2 դպրոցի աշակերտներ և ուսուցիչներ, ինչպես նաև ուսուցիչներ Աղնջաձորից, Թառաթումբից, Արփիից։
Նախքան ընթերցումը, երեխաների հետ զրուցեցինք նրանց հետաքրքրություններից, նրանց ընթերցանության սովորույթներից, իրենց շրջապատում հաշմանդամություն ունեցող երեխաների հետ նրանց հարաբերություններից։ Աշակերտների հետ զրուցեցինք նաև իրենց երազանքների, նպատակների, ապագա մասնագիտության ընտրության մասին։
Այնուհետև կայացավ հանդիպում ուսուցիչների հետ։ Զրույցի ընթացքում նրանք նշեցին, որ շատ են կարևորում նման նախագծերը և հույս հայտնեցին, որ կստեղծվեն նաև կենդանիների հանդեպ բարությունն ու հոգատարությունը խրախուսող նմանատիկ գրքեր, նշելով որ դրա կարիքը տեսնում են։
Հատուկ շնորհակալություն ենք հայտնում Մաշտոց հրատարակչական հիմնադրամին՝ ի դեմս Ռոզա Հարությունյանի, հանդիպումը բարձր մակարդակի վրա կազմակերպելու և մեզ հյուրընկալելու համար։