«ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագիծ։ Այցելություն Գյումրիի N23 հիմնական դպրոց և ԼՈՖԹ Գյումրի
Մայիսի 12-ին «ԱՐԻ գրականության հիմնադրամի» թիմը «ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագծի մարզային այցերի շրջանակներում այցելեց Շիրակի մարզի Գյումրի քաղաքի թիվ 23 հիմնական դպրոցը՝ ներկայացնելու և հանդիպման մասնակիցներին նվիրելու ծրագրի շրջանակներում լույս տեսած «Ես խոսում եմ պարելով» և «Չեմպիոնը» ներառական գրքերը։ Այնուհետև Լոֆթ Գյումրիում կայացավ գրքերի շնորհանդեսը։ Հանդիպումներին մասնակցում էր նաև գրքերի հեղինակ Գայանե Աղաբալյանը։
Գյումրիի դպրոցում հանդիպեցինք չորրորդ դասարանի աշակերտներին, որոնց թվում կային և՛ լսողության, և՛ հենաշարժողական խնդիր ունեցող աշակերտներ։ Գրքերն ընթերցելուց և դրանք քննարկելուց հետո աշակերտները երկար ու բովանդակալից զրույց ունեցան Գայանե Աղաբալյանի հետ, հետաքրքիր հարցեր ուղղեցին նրան։ Զրուցում էին Գյումրու բարբառով, ինչն ավելի անմիջական և ուրախ դաձրեց հանդիպումը։ Վերջում հեղինակը մակագրեց երեխաների գրքերը, իսկ երեխաները իրենց անունները գրեցին հեղինակի օրինակում։
Տարրական օղակի ուսուցիչներն ու մեթոդ միավորման նախագահը մեզ հետ զրույցում պատմեցին, որ բազմաթիվ խնդիրների են բախվում ներառական ուսուցման շրջանակներում և դրանց շուրջ համագործակցում են համապատասխան մարմինների հետ։
Կեսօրից հետո Լոֆթ Գյումրիում կայացավ գրքերի շնորհանդեսը, որին ներկա էր «Չեմպիոնը» գրքի հերոս Գրետա Վարդանյանը։ Երեխաների ոգևորությանը չափ չկար, երբ տեսան իրական Գրետային, ով պատմեց իր կյանքի դժվար ուղու և հաղթանակի բերկրանքի մասին։ «Ես երբեք չեմ դադարել աշխատել, և ոչ մի խոչընդոտ ինձ չի կանգնեցրել հաղթելու ցանկության ճանապարհին»։ Նա խորհուրդ տվեց ներկաներին ևս երբեք չհուսահատվել ու անել ամեն բան՝ իրենց երազանքին հասնելու համար։ Շնորհանդեսից հետո դեռ երկար ժամանակ երեխաները զրուցեցին Գրետայի հետ, խնդրեցին նրան մակագրել իրենց գրքերը։
Հատուկ շնորհակալություն
ենք հայտնում Գյումրու թիվ 23 դպրոցի տնօրեն Գևորգ Հակոբյանին և Լոֆթ Գյումրիին հանդիպումները բարձր մակարդակի վրա կազմակերպելու և մեզ հյուրընկալելու համար։