Երևանի պետական համալսարանի գրադարանում տեղի ունեցավ Գալուստ Կիւլպէնկեան թարգմանական մատենաշարով լույս տեսած Միշել Ֆուկոյի «Գիտելիքի հնագիտությունը» աշխատության հայերեն թարգմանության ներկայացումն ու քննարկումը։
Հանդիպմանը ներկա էին գրքի թարգմանիչ Նազարեթ Կարոյանը, ԱՐԻ գրականության հիմնադրամի տնօրեն Արևիկ Աշխարոյանը, Սոցիոլոգիայի և փիլիսոփայության ֆակուլտետի դեկան Արթուր Մկրտիչյանը, դասախոսներ և ուսանողներ։
Պարոն Կարոյանը ներկայացրեց Ֆուկոյի աշխատությունը և այն դժվարությունները որոնց նա առնչվել է թարգմանության ընթացքում և թե ինչպես է կարողացել հաղթահարել դրանք, ինչ լուծումներ է գտել։ Նա նաև բացատրեց հղացքների իր ընտրությունը և նորերը ստեղծելու անհրաժեշտությունը։ Հղացքների շուրջ ծավալվեց հետաքրքիր քննարկում։
Համագործակցությունը ԵՊՀ Սոցիոլոգիայի ֆակուլտետի հետ կլինի շարունակական ու հաջորդ հանդիպումներին կընդգրկվեն նաև ուսանողներ և դասախոսներ փիլիսոփայության, լրագրության և այլ հումանիտար գիտությունների ֆակուլտետներից և կքննարկվեն մատենաշարով հրատարակված նաև մյուս գրքերը։
