«Վերջին գիշերը երկրագնդի վրա» կոմիքսի շնորհանդեսը Ֆրանկֆուրտի գրքի միջազգային ցուցահանդեսի շրջանակներում

Բոլոր պատմվածքները գրվել են կին հեղինակների կողմից, ում ձայները խորություն և կարեկցանք են հաղորդում թեմային, որում հաճախ գերիշխում են ավանդական պատմությունները: Պատերազմի և դրա հետևանքների նրանց մեկնաբանությունները լույս են սփռում անձնական և կոլեկտիվ դիմադրողականության, կորստի և հույսի վրա։ Պատմություններ ոչ թե մարտադաշտից, այլ տներից, հիշողություններից և հակամարտությանը ազդված առօրյա կյանքից։

Շնորհանդեսը մոդերացնում էր «ԱՐԻ գրականության հիմնադրամ»-ի տնօրեն Արևիկ Աշխարոյանը: Խոսնակներն էին գրքի խմբագիր Միխեիլ Ցիխելաշվիլին, նկարազարդողներ Աստղիկ Հարությունյանը (Հայաստան), Լուկա Լաշխին (Վրաստան) և Սոֆիա Պոկորչակը (Ուկրաինա), որոնցից յուրաքանչյուրը պատմեց իր ստեղծագործական ճանապարհորդության և պատերազմի մասին կանանց պատմությունները վիզուալացնելու մարտահրավերների մասին:

Միջոցառումը ընդգծեց արվեստի և ստեղծագրության սահմաններ չճանաչող ու միավորող ուժը՝ ցույց տալով, թե ինչպես կարող են համատեղ ստեղծագործական փորձառությունները, և հատկապես կանանց ձայները, խթանել փոխըմբռնումը, դիմադրողականությունը և երկխոսությունը մարտահրավերների ժամանակ։

Նախագիծն արդեն իսկ գրավել է բազմաթիվ միջազգային հրատարակիչների ուշադրությունը Ֆրանկֆուրտի գրքի տոնավաճառում, որոնք հետաքրքրված էին գրքի թարգմանությամբ և հրատարակմամբ իրենց երկրներում։