Այս երեք գրքերը Ագամբենի վերջին շրջանի աշխատանքների համառոտ ներածությունն են և ներկայացնում են Ֆուկոյի «տրամադրիչ» հասկացության ուսումնասիրությունը, փիլիսոփայության և բարեկամության ներքին կապի շուրջ խորհրդածությունը, ինչպես նաև ժամանակակից լինելու՝ կամ սեփական ժամանակի հետ մարդու ունեցած առանձնահատուկ հարաբերության շուրջ մտորումը։
Հրատարակության նախաձեռնողը թարգմանիչ Մովսես Տեր-Գևորգյանն է։ Նախագծի նպատակն է երիտասարդ ընթերցողներին և ուսանողներին ներկայացնել այս նշանավոր հեղինակի փիլիսոփայական աշխատությունները՝ մատչելի, հեշտ ընթերցվող և գրավիչ գրպանային գրքերի ձևաչափով։
«Ի՞նչ է տրամադրիչը», արևմտահայերեն, 2021, 96 էջ, փափուկ կազմ՝ ISBN 978-9939-9252-2-6։
«Ի՞նչ է ժամանակակիցը», արևմտահայերեն, 2021, 68 էջ, փափուկ կազմ՝ ISBN 978-9939-9252-1-9։
«Բարեկամը», արևմտահայերեն, 2021, 60 էջ, փափուկ կազմ՝ ISBN 978-9939-9252-0-2։
Հեղինակի մասին
Ջորջիո Ագամբենը (ծն. 1942 թ.) փիլիսոփայության և քաղաքական տեսության առաջատար դեմքերից մեկն է։ Գրականության, գրական տեսության, մայրցամաքային փիլիսոփայության, քաղաքական մտքի, կրոնագիտության և արվեստի իր յուրօրինակ ընթերցումներով նա դարձել է մեր ժամանակների ամենանորարար մտածողներից մեկը։
Ագամբենը իրավագիտություն և փիլիսոփայություն է ուսանել Հռոմի համալսարանում։ 1966-1968 թվականներին Ֆրայբուրգում որպես հետդոկտորական հետազոտող մասնակցել է Մարտին Հայդեգերի՝ Հեգելի և Հերակլիտի վերաբերյալ սեմինարներին։ Այնուհետև 1974-1975 թվականներին եղել է Լոնդոնի համալսարանի Ուորբուրգի ինստիտուտի գիտաշխատող։ Դրանից հետո Ագամբենը սկսել է դասավանդել և հաջորդ չորս տասնամյակների ընթացքում դասավանդել է Եվրոպայի և Ամերիկայի մի շարք հեղինակավոր համալսարաններում։
Իր կարևոր փիլիսոփայական ժառանգությունից բացի՝ Ագամբենը քննադատական ուսումնասիրությունների է ենթարկել կրոնական և իրավական տեքստերը, ինչպես նաև արևմտյան մշակույթի կարևորագույն գրական դեմքերի և բանաստեղծների ստեղծագործությունները։
Թարգմանչի մասին
Գրքերը թարգմանել է Մովսես Տեր-Գևորգյանը։ Նա լիբանանցի ճարտարապետ է, ներկայումս բնակվում է Բրյուսելում, որտեղ ղեկավարում է Sill and Sound Architects ճարտարապետական գրասենյակը։ Ոգեշնչվելով տարբեր թարգմանական նախաձեռնություններից՝ նա առաջին քայլերն է կատարել՝ փիլիսոփայական էսսեները արևմտահայերեն թարգմանելու ուղղությամբ։ Նախաձեռնությունն առավել ամբողջական կերպով ներկայացված է նրա՝ «Թարգմանչի առաջաբանում»։
«Այս աշխատանքի մեկնակետը՝ որպես զուտ թարգմանական աշխատանք, մտքի և լեզվի մարզումն է։ Լեզուների ներսում աշխատելը, սեփական լեզվով աշխատելը, երբեմն մոտենալ նրա սահմաններին, սեփական սահմաններին, բացվել հին ու նոր հասկացությունների առջև, այսինքն՝ ուսումնասիրել, բացահայտել լեզվական մտածողության խիտ կառուցվածքը։ Հիմնականում օտարալեզու հրատարակություններն են մեզ հնարավորություն տալիս բացահայտելու այս ժամանակակից հասկացություններն ու մոտեցումները։ Հետևաբար, այս թարգմանական աշխատանքը հետապնդում է երկու նպատակ․
— Թույլ տալ հայ ընթերցողներին ուսումնասիրել, զարգացնել և ընդլայնել այս արդի հասկացությունները սեփական լեզվով։
— Թղթային գրքերի միջոցով խրախուսել նման աշխատությունների ընթերցումը՝ դրանք հասանելի դարձնելով բոլորին»։