Տեղի ունեցավ «Հիշողության մշակույթ. խորհրդային անցյալը և նրա արտացոլումը հայ գրականության մեջ» նախագծի ամփոփիչ կոնֆերանսը
ԱՐԻ գրականության հիմնադրամը Կոնրադ Ադենաուեր հիմնադրամի հետ համատեղ հաջողությամբ իրականացրեց «Հիշողության մշակույթ. խորհրդային անցյալը և նրա արտացոլումը հայ գրականության մեջ» նախագիծը, որի շրջանակներում իրականցվեցին երեք հետազոտություն։ Դրանց նպատակն էր ուսումնասիրել Հայաստանում խորհրդային և հետխորհրդային գրականության մեջ արտացոլված հիշողության մշակույթը։ Հետազոտությունները շուտով կհրապարակվեն ԱՐԻ գրականության հիմնադրամի և Կոնրադ Ադենաուեր հիմնադրամի կայքէջերում։
Համաժողովը տեղի ունեցավ նոյեմբերի 15-ին՝ Եղիշե Չարենցի տուն-թանգարանում՝ ամփոփելու և հանրայնացնելու հետազոտությունների արդյունքները:
- «Գրական դիմադրությունը և մտավորական ազատությունը 1960-70թթ․» Հրաչ Բայադյան և Մարիամ Կարապետյան
- «Ուրբան հիշողություն․ վերնակուլյար Երևանը խորհրդային գրականության համատեքստում» Տիգրան Ամիրյան և Սոնա Քալանթարյան
- «Գրականությունը՝ որպես «Հոմո սովետիկուսի» կերտման գործիք» Վահրամ Դանիելյան և Արթուր Միրզոյան
Իր բացման խոսքում ԱՐԻ գրականության հիմնադրամի տնօրեն Արևիկ Աշխարոյանը նշեց, որ որպես գրականության հիմնադրամ իրենց համար շատ կարևոր էր հնարավորություն ունենալ կատարել գրականության հետազոտակար ծրագիր, քանի որ գրականությունը կյանքի լավագույն դոկումենտացիան է, իսկ գրականության հետազոտությունը՝ անցյալը հասկանալու և վերագնահատելու միջոց։
Կոնրադ Ադենաուեր հիմնադրամի հարավ-կովկասյան գրասենյակի տնօրեն Շտեֆան Մալերիուսը նշեց, որ հետազոտությունները բազմաթիվ հարցեր են առաջացրել, և դրանք կարող են օգտագործվել որպես հիշողության և դրա հիման վրա հայկական ինքնության հետազոտության գործիք։
Այնուհետև միջոցառման հյուրերին ներկայացվեցին ուսումնասիրություններն ամփոփող ֆիլմեր։ Յուրաքանչյուր հետազոտական խումբ մոդերատորի հետ միասին ներկայացրեց իր աշխատանքը և պատասխանեց ներկաների հարցերին:
