« ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագիծ։ Այցելություն Վանաձորի N8 հիմնական դպրոց և Լոռու մարզային գրադարան
Մայիսի 11-ին «ԱՐԻ գրականության հիմնադրամի» թիմը «ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագծի մարզային այցերի շրջանակներում այցելեց Լոռու մարզի Վանաձոր քաղաքի թիվ 8 հիմնական դպրոցը և Լոռու մարզային գրադարանը՝ ներկայացնելու և հանդիպման մասնակիցներին նվիրելու ծրագրի շրջանակներում լույս տեսած «Ես խոսում եմ պարելով» և «Չեմպիոնը» ներառական գրքերը։ Հանդիպումներին մասնակցում էր նաև գրքերի հեղինակ Գայանե Աղաբալյանը։
Վանաձորի դպրոցում հանդիպեցինք չորրորդ դասարանի աշակերտներին, որոնց թվում կար նաև լսողության խնդիր ունեցող աշակերտ։ Մի փոքր զրույցից հետո աշակերտները կարդացին գրքերը և կիսվեցին իրենց տպավորություններով։ Գրքի հեղինակ Գայանե Աղաբալյանը պատմեց գրքերի ստեղծման պատմությունները և խնդրեց, որպեսզի երեխաները կիսվեն իրենց ոգևորած պատմություններով։ Ուսուցիչների և դպրոցի տնօրենի հետ զրուցեցինք իրենց դպրոցում կիրառվող ներառական կրթության մատուցման մեթոդների մասին։ Դպրոցն ունի 350 աշակերտ, որոնցից տասը հատուկ կարիքներով երեխաներ են։
Դպրոցում աշխատում են մանկավարժի օգնականներ, որոնք հատուկ կարիքներով երեխաների հետ դասեր են անցկացնում։ Դպրոցի տնօրեն Անուշ Սարուխանյանը պատմեց, որ խնդիրները հիմնականում հատուկ կարիքներ ունեցող երեխաներ ծնողների հետ են ունենում, ովքեր պատրաստ չեն ընդունել իրենց երեխաներին այնպիսին, ինչպիսին կան, և երբեմն խոչընդոտում են երեխաների սոցիալականացմանը։ Ուսուցիչները նշեցին, որ շարունակական և հետևողական աշխատանքի արդյունքում բոլոր երեխաները ներգրավվում են դասապրոցեսում և առաջադիմում թե՛ կրթության, թե՛ ինտեգրման գործընթացի մեջ։
Լոռու մարզային գրադարանում հանդիպեցինք մեկ այլ դպրոցի հինգերորդ դասարանցիների և նրանց ուսուցիչների հետ։ Այստեղ գործարկվեց մեկ այլ մեթոդ, երբ առանց նախապատրաստական զրույցի երեխաները կարդացին գրքերը և կիսվեցին իրենց կարծիքնրով ու տպավորություններով։ Քննարկման արդյունքում պարզեցինք, որ գրքի հերոսների հաշմանդամության փաստը չընկալվեց որպես կենտրոնական թեմա, փոխարենը երեխաների կողմից կարևորվեց նպատակներին ձգտելու և դրանց հասնելու մարդկանց ունակությունը՝ անկախ իրենց կարողություններից։ Հանդիպմանը ներկա ուսուցիչները, գրադարանավարները և մանկական հոգեբանը նշեցին, որ նման ձևաչափով հանդիպումները ամենաարդյունավետն են գրքերի միջոցով երեխաների հետ զգայուն թեմաների շուրջ զրուցելու համար։ Հանդիպման կազմակերպման հարցում աջակցություն էր ցուցաբերել արձակագիր Նարինե Կռոյանը, ով նաև ներկա էր միջոցառմանը։
Լոռու մարզային գրադարանի տնօրեն Կարինե Համբարձումյանը տեղեկացրեց, որ վերջին տարվա ընթացքում իրենց թիմն են համալրել հաշմանդամություն ունեցող երկու աշխատակից, ովքեր լիովին տիրապետում են աշխատանքին և գտել են իրենց առաքելությունը։ Գրադարանը առաքում է գրքերը Վանաձորում բնակվող հաշմանդամություն ունեցող ընթերցողներին և տեղեկացել է, որ նրանցից մի քանիսը նաև ստեղծագործողներ են։ Մոտակա ժամանակներում գրադարանում կկազմակերպվեն նրանց գործերի ընթերցումներ՝ օգնելու նրանց սոցիալականացմանը և ստեղծելու անհրաժեշտ պայմաններ հանրային միջոցառումներին նրանց մասնակցության համար։ «ԱՐԻ գրականության հիմնադրամը» ուրախությամբ ընդունեց Լոռու մարզային գրադարանի հետ համագործակցելու առաջարկը և կփորձի մոտակա ժամանակներում այլ ծրագրերի շրջանակներում միջոցառումներ կազմակերպել այնտեղ։
Հատուկ շնորհակալություն ենք հայտնում Լոռու մարզային գրադարանին՝ ի դեմս տնօրեն Կարինե Հակոբյանի և վանաձորի թիվ 8 դպրոցի տնօրեն Անուշ Սարուխանյանին հանդիպումները բարձր մակարդակի վրա կազմակերպելու և մեզ հյուրընկալելու համար։