«ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագիծ։ Այցելություն Արագածոտնի մարզային գրադարան
Մայիսի 23-ին «ԱՐԻ գրականության հիմնադրամի» թիմը «ՏԱՐԲԵՐ ՊԱՏՄՈՒԹՅՈՒՆՆԵՐ․ նկարազարդ գրքեր» նախագծի մարզային այցերի շրջանակներում այցելեց Արագածոտնի մարզային գրադարան՝ ներկայացնելու և հանդիպման մասնակիցներին նվիրելու ծրագրի շրջանակներում լույս տեսած «Ես խոսում եմ պարելով» և «Չեմպիոնը» ներառական գրքերը։
Հանդիպեցինք չորրորդ դասարանում սովորող աշակերտների, ինչպես նաև նրանց ուսուցիչների ու ծնողների հետ։
Մենք հաճելիորեն զարմացած էինք՝ լսելով երեխաների նախընտրած գրականության ցանկը, որը ներառում էր ինչպես հայ, այնպես էլ համաշխարհային մանկապատանեկան գրականության լավագույն գործերը։
Աշակերտները ծանոթ էին թե՛ ներառականության, թե՛ հաշմանդամության, թե՛ բուլինգի թեմաներին։ Նրանք պատմեցին, որ իրենց շրջապատում ևս կան հաշմանդամություն ունեցող մարդիկ, ինչը սակայն երբեք հետ չի պահել իրենց նրանց հետ շփվելուց, խաղալուց, ընկերություն անելուց։
Երեխաները անչափ ոգևորվեցին՝ ընթերցելով գրքերը և ասացին, որ անպայման կհետևեն գրքերի հերոսների օրինակին ու երբեք չեն հանձնվի ու չեն հիասթափվի իրենց նպատակին հասնելու ճանապարհին։
Հատուկ շնորհակալություն
ենք հայտնում Արագածոտնի մարզային գրադարանին՝ ի դեմս տնօրեն Լուսինե Կիրակոսյանի հանդիպումը բարձր մակարդակի վրա կազմակերպելու և մեզ հյուրընկալելու համար։